Magnús Benediktsson, stjórnarmeðlimur í Sambandi ungra Sjálfstæðismanna, segir að samkvæmt nýjum ársreikningi Reykjavíkurborgar skuldi hver og einn íbúi Reykjavíkurborgar rúmlega þrjár milljónir.  Hann gagnrýnir skuldaaukningu borgarinnar á kjörtímabilinu og segir að það verði unga fólkið í borginni sem þurfi að bera þessar skuldir á herðunum næstu áratugina. Þetta sé nokkuð sem hafa beri í huga þegar gengið er til kosninga í maí. Hann ritar um þetta í pistli á Vísi.

„Já þú last þetta rétt. Hver og einn íbúi í Reykjavík skuldar 3.056.402 krónur samkvæmt nýjasta ársreikningi Reykjavíkurborgar. Í upphafi kjörtímabilsins 2018 námu skuldir Reykjavíkurborgar (A og B hluti) 300 milljörðum en nú hefur þessi tala aukist um 107 milljarða og stendur því heildarskuld Reykjavíkurborgar í 400 milljörðum. Sem samsvarar 3.056.402 á hvern íbúa í Reykjavík.“ 

Magnús setur þessar tölur í samhengi við heildarkostnað við byggingu Hörpunnar, sem voru 28 milljarðar miðað við vísitölu byggingarkostnaðar í mars á þessu ári.

„Við erum því að tala um skuldaaukningu á við tæplega fjórar Hörpur á einungis fjórum árum. Það erum við unga fólkið sem munum þurfa að greiða þessar skuldir.“ 

Magnús segir meirihlutann í borginni hafa misst alla tilfinningu fyrir borgarbúum.

„[meirihlutinn] kaus frekar að nota góðærisárin 2017-2018 og tekjuaukningu á kjörtímabilinu í að auka skuldirnar í stað þess að greiða þær niður, ólíkt því sem ríkissjóður gerði. Fólk fattar oft ekki að það er einmitt helst í gegnum fjölgun og hækkun gjalda og skatta sem borgarbúar greiða þessar skuldir niður. Verði það fasteignagjöld, rafmagnið, vatnið eða jafnvel bara bílastæðagjöld.“ 

Magnús segir að þetta skili sér til dæmis í hærra leiguverði og því sé ekki furða að unga fólkið sé að festast á leigumarkaði eða í foreldrahúsum.

„Þessi meirihluti skuldsetur borgarsjóð upp fyrir öll mörk og það erum við unga fólkið i Reykjavík sem munum á endanum bera þessar skuldir á herðum okkar yfir næstu áratugi og það erum við sem munum þurfa að greiða þær. Höfum þetta í huga þegar við göngum til kosninga í maí.“