Umheimurinn hefur fordæmt innrás Rússa í Úkraínu, þó með fáeinum undantekningum, og er óhætt að segja að Rússar séu nú einangraðir og vinafáir á alþjóðavettvangi. Vesturlönd hafa beitt Rússa margvíslegum refsiaðgerðum sem eru nú þegar farnar að bíta. Vladímír Pútín, Rússlandsforseti, hefur eflaust ekki gert sér grein fyrir hversu hörð viðbrögð umheimsins við innrásinni myndu verða. Ef þú lesandi góður hefur áhuga á að leggja þitt af mörkum í refsiaðgerðunum og forðast að kaupa rússneskar vörur þá er til einfalt ráð við því sem krefst ekki mikils tíma þegar verslað er inn.

Margar verslanir hafa tekið rússneskar vörur úr sölu en hugsanlega hafa einhverjar sloppið í gegnum nálaraugað og eru enn til sölu. Það er auðvelt að sjá hvaða vörur eru frá Rússlandi með því að lesa á strikamerkin. Þrjár fyrstu tölurnar í strikamerki hverrar vöru segja til um upprunaland hennar. Rússneskar vörur eru með strikamerki sem byrja á 460 til 469. Þetta eru því vörur sem byrja á 460, 461, 462, 463, 464, 465, 466, 467, 468 og 469.

Ef þú vilt ganga enn lengra og forðast vörur frá Hvíta-Rússlandi, sem styður stríðsrekstur Rússa, þá eru fyrstu þrjár tölurnar í strikamerkjum varnings þaðan 481.

Ef þú vilt styðja Úkraínu og kaupa úkraínskar vörur þá byrja strikamerki varnings þaðan á 482.