Kisukot, kattaaðstoð sem hefur verið starfrækt í heimahúsi á Akureyri undanfarinn áratug, verður lokað á næstu dögum. Greint er frá þessu í færslu Kisukots á Facebook.

„Yfirvöld hér í bæ hafa gert okkur erfitt fyrir og ætlast til hluta sem aðrir í okkar stöðu hafa ekki þurft að gera. Sbr. að biðja um að við fáum leyfi fyrir breyttri húsnotkun. Það leyfi fæst ekki nema að uppfylltum skilyrðum sem er einfaldlega ekki hægt að uppfylla í heimahúsi. Það er fullt af fólki víðsvegar um landið sem tekur til sín í ketti í vanda og fóstrar á meðan leitað er að heimilum. Meðan ekki fæst húsnæði er ekki hægt að halda þessari starfsemi áfram,“ segir í færslunni.

Ragnheiður Gunnarsdóttir, eigandi Kisukots, greindi frá því fyrir um þremur mánuðum að hún hafi í nóvemberlok fengið símtal frá heilbrigðiseftirlitinu þar sem henni var tilkynnt að hún yrði að sækja um starfsleyfi fyrir Kisukot, og uppfylla ýmis skilyrði til að fá það leyfi. Þá þyrfti hún að fá samþykki frá skipulagsstjóra bæjarins og byggingarfulltrúa til að nýta húsið sem kattaaðstoð en hún hefur vistað þá á eigin heimili meðan leitað er að nýju heimili fyrir þá ketti sem finnast.

Akureyri hefur verið í skotlínu kattavina síðustu mánuði en meirihluti bæjarstjórnar Akureyrarbæjar samþykkti á fundi í októbermánuði bann við lausagöngu katta frá 1. janúar 2025.

Færslan um fyrirhugaða lokun Kisukots hefur fengið mikil viðbrögð en hana má nálgast hér að neðan.