Nafnlaus velgjörðarmaður UNICEF á Íslandi ætlar sér að jafna öll framlög í neyðarsöfnun UNICEF á Íslandi fyrir Úkraínu um allt að 15 milljónir.

Þetta kemur fram í tilkynningu frá UNICEF á Íslandi. „Við höfum fengið staðfestingu frá velunnara samtakanna hér á landi, sem óskar nafnleyndar, að öll framlög í neyðarsöfnun UNICEF á Íslandi fyrir Úkraínu verða jöfnuð af viðkomandi upp að alls 15 milljónum króna,“ segir í tilkynningunni.

„Það er gríðarlega verðmætt fyrir fjáröflun UNICEF á Íslandi fyrir börn í Úkraínu að vita að hvert framlag sem nú berst telur í raun tvöfalt, þökk sé þessari ótrúlegu gjöf,“ segir Birna Þórarinsdóttir, framkvæmdastjóri UNICEF á Íslandi.

„Orð ná vart yfir það hversu þakklát við erum velgjörðarmanni okkar sem vill að styrkur hans nýtist sem best í þágu réttinda barna í Úkraínu. Við vonum að þetta göfuglyndi reynist öllum landsmönnum og fyrirtækjum hér á landi hvatning til að styðja við börn og fjölskyldur í Úkraínu sem nú eiga um sárt að binda og þurfa tafarlausa aðstoð.“

Framlög í neyðarsöfnun UNICEF á Íslandi fara til að veita nauðsynlega mannúðaraðstoð í Úkraínu og nágrannalöndunum þar sem UNICEF er að setja upp barnavæn svæði fyrir börn og fjölskyldur á flótta.