Fréttamaður Reuters segir að ómerktir herbílar og skriðdrekar hafi sést í Donetsk í nótt. Pútín skipaði varnarmálaráðuneytinu að senda hermenn til héraðanna tveggja í nótt til að sinna friðargæslu að hans sögn. Linda Thomas-Greenfield, sendiherra Bandaríkjanna hjá Sameinuðu þjóðunum, sagði á fundi öryggisráðsins, sem var boðað til neyðarfundar vegna málsins, að fyrirsláttur Rússa um „friðargæslulið“ væri ekkert annað en hlægilegur. „Hann (Pútín, innsk. blaðamanns) kallar þetta friðargæslulið en við vitum hvað þetta er í raun,“ sagði hún.
Með því að viðurkenna sjálfstæði Donetks og Lugansk hafa Rússar tryggt sér rétt til að reisa herstöðvar í héruðunum. Þetta kemur fram í samningi sem Pútín skrifaði undir við yfirlýsta leiðtoga héraðanna. Samkvæmt honum heita samningsaðilar því að verja hver annan og eiga samstarf á hernaðarsviðinu.
Vesturlönd hafa fordæmt aðgerðir Rússa og Antonio Guterres, aðalritari Sameinuðu þjóðanna, sagði í nótt að Rússar hafi brotið gegn fullveldi Úkraínu með því að viðurkenna sjálfstæði héraðanna tveggja.
Kínverjar hafa hvatt deiluaðila til að sýna stillingu og til að leysa málið eftir diplómatískum leiðum.
ESB, Bandaríkin og Bretland tilkynna um refsiaðgerðir gegn Rússlandi í dag vegna atburða gærkvöldsins og næturinnar.
Volodimir Zelenskij, forseti Úkraínu, sagði í ræðu í nótt að þjóðin hafi ekki hugsað sér að láta Donetsk og Lugansk af hendi og sé einbeitt í að fara friðsama og diplómatíska leið og muni eingöngu fylgja þeirri leið. „Við erum ekki hrædd við neinn eða neitt. Við skuldum engum neitt og við látum ekki neitt af hendi,“ sagði hann.
