Daglega heyrum við tölur um mikinn fjölda kórónuveirusmita og margir eru því fjarverandi frá vinnu og námi. Daglegu smittölurnar segja örugglega ekki alla söguna því reikna má með að miklu fleiri smitist daglega en þar sem Ómíkronafbrigðið veldur yfirleitt ekki alvarlegum veikindum, og sumir eru jafnvel einkennalausir, þá fara ekki allir í sýnatöku sem eru smitaðir. Eflaust hugsa margir, sem enn hafa ekki smitast, að það sé bara tímaspursmál hvenær þeir smitast. En er það svo?

Margir hafa upplifað að fjölskyldumeðlimir, vinir, kunningjar og vinnufélagar smitast en hafa sjálfir sloppið við smit og það þrátt fyrir að hafa umgengist smitaða fólkið eftir að það veiktist og fékk sjúkdómseinkenni. En það getur verið að ákveðin skýring sé á þessu.

Rannsókn, sem var birt í janúar, beindist að því að finna skýringu á af hverju sumir smitast ekki af kórónuveirunni. Niðurstöðurnar eru að að það gæti verið vegna þess að viðkomandi hafi fengið kvef, sem önnur tegund kórónuveiru veldur, og það hafi valdið því að viðkomandi hafi myndað ónæmi gegn kórónuveirunni SARS-CoV-2 sem veldur COVID-19.

Það eru til margar tegundir af kórónuveirum og margar þeirra valda kvefi. Þær hafa verið til lengi, miklu lengur en SARS-CoV-2. Kvef, af völdum kórónuveiru, gæti að mati vísindamanna verið ástæðan fyrir að sumir smitast ekki af SARS-CoV-2 eða verða ekki veikir þótt þeir smitist.

TV2 hefur eftir Søren Riis Paludan, prófessor við líflæknisfræðideild Árósaháskóla að hugsanlega séu margir ónæmir fyrir SARS-CoV-2 af þessari ástæðu. Hann sagði að þeir sem greinast ekki með smit, eftir að hafa verið nálægt smituðu fólki, séu með ákveðnar T-frumur sem bregðast við ákveðnum kórónuveirum og ýmislegt bendi til að þetta fólk sé með töluvert ónæmi gagnvart SARS-CoV-2.

T-frumur eru eins og mótefni hluti af ónæmiskerfi og ónæmisviðbrögðum sem vernda okkur gegn veikindum. T-frumur og mótefni eru miðpunktur þess hluta ónæmiskerfisins sem veitir langvarandi ónæmi.