NBC Boston segir að Adam Montgomery, 31 árs, hafi verið handtekinn grunaður um að hafa beitt Harmony ofbeldi árið sem hún hvarf. Saksóknari segir að Adam eigi einnig kæru yfir höfði sér fyrir að hafa stofnað lífi Harmony í hættu. Hann var handtekinn í heimabæ sínum, Manchester, en þar sást síðast til Harmony. Hann er með forræði yfir Harmony.
Hún er ófundin en lögreglan segir að leit verði haldið áfram. Málið hefur vakið mikla athygli því ekki var tilkynnt um hvarf Harmony fyrr en rúmlega tvö ár voru liðin frá því að síðast sást til ferða hennar.
Það voru félagsmálayfirvöld í New Hampshire sem gerðu lögreglunni viðvart um málið í síðustu viku. Lögreglan hefur opnað sérstakt símanúmer til að taka við ábendingum í málinu og 60.000 dollurum hefur verið heitið í verðlaun fyrir upplýsingar sem leiða til þess að Harmony finnist.
„Einhvers staðar þarna úti er þessi litla stúlka og þarfnast hjálpar og það er verkefni okkar að finna hana heila á húfi en til þess þurfum við hjálp ykkar,“ sagði Allen Aldenberg, lögreglustjóri í Manchester á fréttamannafundi á mánudaginn.
Fram kom að Harmony hafi verið skráð í skóla í Massachusetts en móðir hennar býr þar.
Hún sást síðast 1. október 2019 þegar lögreglan fór heim til hennar til að kanna aðstæður eftir að tilkynning hafði borist um að aðstæður á heimilinu væru ekki góðar. Harmony er blind að hluta og notar gleraugu. Lögreglan telur að hún sé um 121 cm á hæð og tæp 23 kíló.
Ekki liggur fyrir af hverju það leið svo langur tími þar til tilkynnt var um hvarf hennar. Margir ættingjar hennar hafa verið yfirheyrði en Aldenberg vildi ekki segja hvaða upplýsingar hefðu komið fram í þeim yfirheyrslum vegna rannsóknarhagsmuna.
