Yfir hátíðarnar eiga það margir til að draga fram spil og spila með vinum og vandamönnum. Margir ætla sér að skapa ljúfar fjölskylduminningar með því að setjast niður og spila í rólegheitunum en sömu rólegheit geta verið ansi fljót að umturnast í rifrildi þegar ákveðin spil eru spiluð.

Spilið Monopoly hefur líklegast skemmt fleiri vinasambönd en það hefur skapað og klárast spilið oft þegar fyrsti spilari fer grátandi upp í herbergi þar sem reglurnar geta verið ansi loðnar og mismunandi hvort fólk fer eftir þeim eður ei.

Langflestir hafa sínar húsreglur þegar kemur að Monopoly, til að mynda að allur skattur greiðist í miðjuna sem spilarinn sem lendir á „frítt stæði“ reitnum fær.

Þó eru einnig til reglur sem nánast enginn veit af. Ein þeirra gjörsamlega breytir því hvernig spilið er spilað, þá sérstaklega á lokasprettinum.

Reglan er sú að þegar leikmaður situr í fangelsi eftir að hafa lent á „farðu í fangelsi“ reitnum eða fengið þrjár tvennur í röð þá getur hann samt sem áður keypt eignir og fær einnig greitt þegar aðrir leikmenn lenda á eignum þess sem situr í fangelsinu. Því getur það mögulega verið góð taktík að dúsa í fangelsi í staðinn fyrir að eiga í hættu á að lenda á eignum annarrar spilara.

Einhverjir hugsa með sér að auðvitað sé ekki hægt að kaupa eignir þegar þú ert í fangelsi en það er einnig mýta. Samkvæmt leikreglunum fara eignir sem leikmaður lendir á en ákveður að kaupa ekki á uppboð. Aðrir spilarar mega þá bjóða í eignina ef þeir hafa áhuga á henni, þar á meðal fangar.

Leikmaður sem lendir á eign og setur hana á uppboð má einnig bjóða í eignina og gæti því fengið hana á lægra verði en hún er metin á.

Til að koma í veg fyrir óeirðir yfir jólatímann eru lesendur vinsamlegast beðnir um að fara yfir leikreglurnar og hvaða húsreglur gildi með meðspilurum áður Monopoly er spilað.