Klukkan hálf þrjú í nótt stöðvuðu lögreglumenn akstur 16 ára ökumanns í Miðborginni. Röng skráningarmerki voru á bifreiðinni sem var ótryggð og óskoðuð. Í henni voru þrír farþegar, allir yngri en 16 ára. Málið var unnið með aðkomu foreldra barnanna og Barnavernd gert viðvart um það.

Á þriðja tímanum var tilkynnt um líkamsárás í Hlíðahverfi. Árásarþolinn fór á Bráðadeild til aðhlynningar en hann var með áverka í andliti og á höfði. Meintur árásarmaður var handtekinn nokkru síðar og vistaður í fangageymslu.

Skömmu fyrir klukkan fjögur var maður í annarlegu ástandi handtekinn í Vesturbænum en hann var að valda ónæði þar. Hann var vistaður í fangageymslu.

Á sjöunda tímanum í gær var maður í annarlegu ástandi handtekinn í Kópavogi en hann er grunaður um hótanir. Hann var vistaður í fangageymslu.

Einn ökumaður var handtekinn í nótt grunaður um að vera undir áhrifum áfengis og fíkniefna, ítrekaðan akstur án gildra ökuréttinda og vörslu fíkniefna.