Maður var skotinn til bana á Norðurbrú í Kaupmannahöfn síðdegis í gær. Samkvæmt upplýsingum frá lögreglunni var hann skotinn í bakið og lést á vettvangi.

Mikill fjöldi lögreglumanna var á vettvangi í gær og stóru svæði var lokað.

Fregnir hafa verið sagðar af því að undanförnu að mikill óróleiki sé í undirheimum Kaupmannahafnar og grunnt sé á því góða á milli margra skipulagðra glæpagengja.

Lögreglan handtók tvo menn vegna rannsóknar málsins um kvöldmatarleytið í gær. Hún segir að sá látni hafi verið þekktur hjá lögreglunni vegna tengsla hans við skipulögð glæpasamtök.