Karlmaður á fimmtugsaldri var skotinn til bana í Farsta í suðurhluta Stokkhólms í gærkvöldi. 15 ára piltur liggur alvarlega særður á sjúkrahúsi en hann var með hinum látna þegar skotið var á þá.

Expressen skýrir frá þessu. Blaðið hefur eftir talsmanni lögreglunnar að tilkynnt hafi verið um skothríð um klukkan 22. Á vettvangi hafi tveir slasaðir menn fundist og voru þeir báðir alvarlega særðir að sögn talsmannsins.

Báðir voru fluttir með þyrlu á sjúkrahús. Þar lést eldri maðurinn en sá yngri liggur þungt haldinn á sjúkrahúsi.

Enginn hefur verið handtekinn vegna málsins en lögreglan hefur unnið að rannsókn þess í alla nótt.

Þetta var annað kvöldið í röð sem skotárás var gerð í Farsta, sem er í suðurhluta Stokkhólms. Á mánudagskvöldið skutu tveir menn á hjólreiðamann. Lögreglan fann hjólreiðamanninn ekki og heldur ekki árásarmennina en skothylki fundust á vettvangi.