Víkingur komst á topp deildarinnar með 2-1 sigri gegn KR en gríðarleg dramatík var undir lok leiks. Á sama tíma tapaði Breiðablik í Kaplakrika sem þýðir að Víkingur getur orðið Íslandsmeistari ef liðið vinnur næsta leik. Arnar Gunnlaugsson hafði þetta að segja í viðtali við Stöð 2 Sport strax eftir leik.

„Þetta var rosalegt. Þetta var bara fáránlegt,“ sagði Arnar Gunnlaugs hálf orðlaus við Stöð 2 Sport.

„Við töluðum um það í hálfleik að halda haus. Mér fannst fyrri hálfleikurinn flottur en menn voru þungir á sér eftir bikarleikinn greinilega en þeir börðust og börðust. Við megum fagna núna en svo er það bara fókus, fókus, fókus. Þetta er það rosalegasta sem ég hef lent í og ferillinn minn er búinn að vera langur. Þetta var bara geggjað,“ sagði Arnar við Stöð 2 Sport

Blikar voru í bílstjórasætinu fyrir þennan leik en þeir töpuðu fyrir FH.

„Bæði lið eiga bara skilið að vinna titilinn, bæði lið hafa verið frábær. Við erum núna komnir með yfirhöndina en þurfum að ná tökum á okkar tilfinningum og æfa vel í vikunni og þá klárum við þetta.“

Gríðarleg dramatík var undir lok leiks en KR fékk víti í uppbótartíma sem Ingvar Jónsson varði.

„Það leið svo langur tími að ég veit ekkert hvað gerðist. Línuvörðurinn hefur greinilega séð eitthvað. Ég ætla að opna eina rauðvín og horfa svo á leikinn sirka þrisvar áður en ég fer að sofa,“ sagði Arnar Gunnlaugsson að lokum við Stöð 2 Sport.