Lokaumferð Pepsi Max deild kvenna lauk í dag þegar að sex lið áttust við. Valur hafði þegar tryggt sé Íslandsmeistaratitilinn og því ekkert í húfi nema heiðurinn í viðureign Breiðablik og Þróttara.

Það var hins vegar spenna í fallbaráttunni þar sem Keflavík þurfti stig gegn Þór/Ka til að tryggja sér sæti í efstu deild á næstu leiktíð og Tindastóll þurfti að vinna Stjörnuna á heimavelli til að eiga möguleika á að halda sér uppi.

Breiðablik, sem skrifaði sig í sögubækurnar fyrr í vikunni þegar liðið komst áfram í riðlakeppni Meistaradeildarinnar fyrst íslenskra liða, endaði tímabilið með stæl með 6-1 sigri gegn Þrótturum á heimavelli. Breiðablik og Þróttur ljúka keppni í 2. og 3. sæti en liðin mætast aftur í úrslitaleik Mjólkurbikarsins þann 1. október næstkomandi.

Agla María Albertsdóttir átti annan frábæran leik í liði Blika þar sem hún lagði upp þrjú og skoraði eitt. Hana tókst þó ekki að hreppa markadrottningartitilinn en hann hlýtur Selfyssingurinn Brenna Lovera sem lýkur tímabilinu með 11 mörk en Agla María er þar á eftir með 10 mörk.

Keflavík tryggði sér sæti í efstu deild á næstu leiktíð með markalausu jafntefli gegn Þór/Ka á útivelli. Tindastóll komst í forystu gegn Stjörnunni eftir fimm mínútna leik með marki frá Hugrúnu Pálsdóttur. Elína Helga Ingadóttir jafnaði metin fyrir Garðbæinga þremur mínútum síðar og allt stefndi í jafntefli en Mist Smáradóttir sendi Tindastól endanlega niður um deild með marki á 85. mínútu og 2-1 sigur Stjörnunnar staðreynd sem endar tímabilið í 4. sæti með 27 stig.