Sveindís Jane Jónsdóttir reyndist hetja Kristianstads sem tók á móti Linköping í sænsku úrvalsdeildinni í dag.

Sif Atladóttir og Sveindís Jane voru báðar í byrjunarliðinu og það var hin unga og efnilega Sveindís Jane sem skoraði sigurmark Kristianstads á 51. mínútu.

Sveindís hefur nú skorað fimm mörk í þrettán deildarleikjum á tímabilinu en hún kom á láni frá þýska liðinu Wolfsburg í sumar.

Með sigrinum fór Kristianstads fyrir ofan Linköping í 5. sæti með 24 stig. Linköping er í 6. sæti með 21 stig. Kristianstads á enn möguleika á að enda í einum af þremur efstu sætunum í deildinni þegar sex leikir eru eftir af tímabilinu.

Guðrún Arnardóttir lék allan leikinn í liði Rosengard sem hélt stöðu sinni á toppnum með 2-1 sigri á Hammarby.  Rosengard hefur staðið sig frábærlega á tímabilinu en liðið hefur enn ekki tapað leik.

Berglind Björg Þorvaldsdóttir var í byrjunarliði Hammarby en kom af velli stuttu fyrir leikslok. Hammarby er í 4. sæti með 24 stig, líkt og Kristianstads.