Keppt var í lokaumferð Lengjudeildar kvenna í kvöld.

KR-ingar tryggðu sér sæti í efstu deild um síðustu helgi en gátu unnið titilinn með sigri á Gróttu í kvöld. Afturelding og FH mættust í úrslitaleik um annað sætið í efstu deild á næstu leiktíð og fimm lið áttu möguleika á falli fyrir leiki kvöldsins.

KR sýndi yfirburði sína með 3-0 sigri gegn Gróttu á útivelli. Kathleen Rebecca Pingel kom KR í 2-0 foryustu með tveimur mörkum í fyrri hálfleik og Aiden Hogan Keane gerði út um leikinn með marki lokakafla leiksins. KR vinnur þar með Lengjudeildartitilinn en Grótta endar í 9. sæti og fellur þar með um deild.

Afturelding fylgir KR upp í Pepsi Max deildina næsta sumar en liðið burstaði FH-inga 4-0 á heimavelli. Það var markalaust þegar að tæpar 20 mínútur voru eftir af venjulegum leiktíma en Sigrún Gunndís Hraðardóttir skoraði fyrsta markið eftir hornspyrnu frá Rögnu Guðrúnu Guðmundsdóttur. Ragna Guðrún bætti svo við tveimur mörkum áður en að Guðrún Elísabet Björgvinsdóttir skoraði fjórða markið á 84. mínútu.

ÍA tókst ekki að bjarga sér og endar tímabilið á botninum eftir hetjulega frammistöðu gegn Haukum í kvöld. Haukar komust í 3-0 í leiknum en Skagakonum tókst að jafna í 3-3. Það dugði hins vegar ekki til og leikur liðið í 2. deild næsta sumar.

Þá vann Augnablik 2-0 sigur gegn HK á útivelli. Báðum liðum tekst þar með að bjarga sér frá falli en HK endar tímabilið í síðasta örugga sætinu með 16 stig. Augnablik er sæti og stigi fyrir ofan.

Víkingar unnu þá Grindavík 1-0 á Víkingsvelli. Víkingur endar þar með leiktíðina í 4. sæti með 31 stig. Grindavík og Augnalik ljúka keppni með 17 stig í 6/7. sæti.