„Það er svo sannarlega ekki í þágu hagsmuna Humboldt háskólans að mismuna fólki,“ segir í yfirlýsingu frá stjórnendum háskólans en hana sendu þeir frá sér eftir að háskólinn komst í sviðsljósið vegna atvinnuauglýsingar þar sem fram kom að hvítt fólk ætti helst ekki að sækja um starfið.

Berline Zeitung skýrir frá þessu. Fram kemur að um ráðgjafastöðu var að ræða þar sem nemendum af innflytjendaættum væru veitt ráð og aðstoð sem og transfólki.  Í auglýsingunni stóð að það hafi reynst best í tengslum við þetta ráðgjafastarf að ráðgjafinn væri svartur eða litaður. „Við biðjum því hvítt fólk um að sækja ekki um þessa stöðu,“ stóð í auglýsingunni.

Í kjölfarið helltist gagnrýni yfir þennan elsta háskóla Berlínar og svo virðist sem stjórn hans hafi hlustað á gagnrýnina því hún brást við með því að láta breyta auglýsingunni og segir nú í henni að það hafi reynst best í tengslum við þetta ráðgjafastarf að ráðgjafinn geti miðlað af eiginn reynslu af kynþáttamisrétti og því er fólk, sem upplifir kynþáttamismunum, hvatt til að sækja um starfið en ráðið verður í stöðuna frá 15. september.