Í grein í New York Times sakar fjöldi kvenna egypska embættismenn um að hafa beitt þær kynferðislegu ofbeldi. Þetta á við um lögreglumenn, heilbrigðisstarfsmenn og fangaverði. Egypsk stjórnvöld neita þessum ásökunum og segja þær vera tilraun til að „dreifa lygum og óhróðri“.

Í greininni kemur fram að konur eigi á hættu að verða fyrir kynferðisofbeldi af hálfu egypskra embættismanna þegar þeir leita á þeim. Til dæmis á sjúkrahúsum, í fangelsum og þegar lögreglumenn hafa afskipti af þeim.

Í yfirlýsingu stjórnvalda á Facebook og Twitter er þessum ásökunum vísað á bug en ekki kemur fram hvort ásakanirnar hafi verið rannsakaðar.

Aðeins fjórar af konunum koma fram undir nafni en hinar kjósa nafnleysi af ótta við hefndaraðgerðir embættismanna.

Asmaa Abdel Hamid segir að fyrir þremur árum hafi hún verið handtekin fyrir að mótmæla verðhækkunum á lestarmiðum. Í kjölfarið hafi ítarleg líkamsleit verið gerð á henni þrisvar sinnum. Hún segist hafa verið neydd til að afklæðast fyrir framan hóp lögreglumanna og síðan látin gangast undir svokallaða „jómfrúarrannsókn“. Eftir það stakk kvenkyns fangavörður fingri upp í endaþarm hennar.

Transkona ein sagði New York Times að eftir að hún var handtekin fyrir tveimur árum hafi hún verið látin gangast undir endaþarmsrannsókn til að hægt væri að skera úr um kyn hennar.

Blaðið segir að mannréttindasamtök hafi árum saman skráð svipuð mál.