Bandaríska leikkonan Allison Mack sér eftir að hafa verið meðlimur í kynlífssöfnuðinum NXIVM og segir það hafa verið stærstu mistök lífsins. Þetta kemur fram í bréfi sem hún sendi dómstól í Bandaríkjunum sem mun kveða upp dóm í máli hennar á morgun.

Margir erlendir fjölmiðlar hafa komist yfir bréfið frá þessari 38 ára leikkonu. „Ég bið þá afsökunar sem ég fékk til liðs við NXIVM. Mér þykir miður að ég hafi orðið til þess að þið þurftuð að þola þessa grimmdarlegu misnotkun af hálfu þessa manns,“ segir að sögn í bréfinu.

Í bréfinu biður hún einnig nánustu aðstandendur sínar afsökunar fyrir að hafa ítrekað logið þegar þeir reyndu að koma henni úr söfnuðinum. „Ég laug að ykkur,“ segir hún.

Mack var handtekin fyrir þremur árum grunuð um að hafa selt fólk til kynlífsþrælkunar og nauðungarvinnu. Hún hefur játað að hafa fengið konur til að verða kynlífsþrælar Keith Raniere, leiðtoga safnaðarins.

Raniere var dæmdur í 120 ára fangelsi á síðasta ári. Mack var meðal æðstu meðlima safnaðarins.