Ólafur Kristjánsson, knattspyrnuþjálfari, var sérfræðingur í þættinum ,,EM í dag“ á Stöð 2 Sport í kvöld. Þar ræddi hann leik Englands og Skotlands. Hann var ekki hrifinn af leik þess fyrrnefndu.
Leiknum í kvöld lauk með markalausu jafntefli. Þeir ensku áttu ekki sinn besta dag og Skotar náðu í mikilvægt stig.
Það er alltaf mikil pressa á enska landsliðinu á stórmótum. Það er talað um að ef Englendingar vinni stórmót muni fótboltinn ,,koma heim.“
Ólafur telur ekki miklar líkur á því að það gerist eftir að hafa séð leik enska liðsins í kvöld.
,,Viðar (Örn Kjartansson) var að tala um að fótboltinn væri vonandi á leiðinni heim. Kannski hef ég haft einhverja von um það líka að hann væri á leiðinni heim en þeir þurfa sennilega að tilkynna breytingu á heimilisfangi vegna þess að það sem Englendingarnir komu með miðað við þær væntingar sem við höfðum til þeirra var ekki nógu gott,“ sagði Ólafur í ,,EM í dag.“
