Manchester City er að íhuga að fá Sergio Ramos til liðsins samkvæmt ESPN. Spænski miðvörðurinn hefur verið frábær fyrir Real Madrid og skorað yfir 100 mörk. Samningur hans við spænska stórveldið rennur út 30. júní og segir í frétt Marca að samningur sé ekki nálægt því að vera í höfn.
Manchester City er í leit að nýjum varnarmanni þar sem Eric Garcia er á leið til Barcelona og ýmsir miðlar eru að orða Aymeric Laporte við brottför frá félaginu,
Pep Guardiola er mjög hrifinn af leiðtogahæfileikum Ramos samkvæmt ESPN og myndi bjóða honum tveggja ára samning.
Það er þó ekki öll von úti fyrir Real Madrid þar sem einnig segir í frétt ESPN að umboðsmaður Ramos ætli á fund með Florentino Perez, forseta Real Madrid, á föstudag þar sem reynt verður að ganga frá samningi. Aðalvandamálið er það að Ramos vill tveggja ára samning en Real Madrid hefur haft það að venju að bjóða aðeins eins árs samninga fyrir menn yfir 30 ára.
