Venezia er komið upp í efstu deild á Ítalíu eftir seinni leikinn í umspilinu gegn Cittadella. Leikurinn í kvöld endaði með 1-1 jafntefli liðanna, en fyrri leikurinn fór 1-0 fyrir Venezia.
Cittadella komst yfir á 26. mínútu með marki frá Federico Proia eftir stoðsendingu frá Manuel Iori.
Tíu mínútum síðar dró aftur til tíðinda þegar Pasquale Mazzocchi fékk tvö gul spjöld á sömu mínútunni og þar með rautt spjald. Aftur dró til tíðinda á 70. mínútu þegar Mattia Aramu, sem hefur verið einn besti leikmaður liðsins á tímabilinu, fékk beint rautt spjald og Venezia þá í vondum málum, tveimur færri.
Allt benti til framlengingar en í lok uppbótartíma jafnaði Ricardo Bocalon metin og tryggði Venezia þar með sæti í Seria A með ótrúlegum hætti.
Tveir Íslendingar eru í herbúðum Venezia, Óttar Magnús Karlsson og Bjarki Steinn Bjarkarson. Bjarki Steinn spilaði um tíu mínútur í fyrri leik liðanna en sat allan tímann á varamannabekknum í kvöld. Óttar Magnús spilaði síðast leik 2. apríl en hann er að glíma við meiðsli.
WE’RE BACK! 🟠⚫️🟢 pic.twitter.com/WXvH2PfnLw
— Venezia FC (@VeneziaFC_EN) May 27, 2021
