Á sjötta tímanum í gær var tilkynnt um umferðarslys í Bústaðahverfi. Þar var ekið á 63 ára konu sem var á reiðhjóli, hún fann til eymsla í baki. Lögreglan hafði afskipti af manni í verslun einni í gær en þar skemmdi hann umbúðir utan af ilmvatni. Hann var kærður fyrir eignaspjöll. Á sjöunda tímanum hafði lögreglan afskipti af tveimur mönnum sem eru grunaðir um að hafa stolið krukku með þjórfé starfsfólks af veitingastað í miðborginni.

Á sjötta tímanum í gær var maður í annarlegu ástandi handtekinn við veitingastað í miðborginni en hann var að áreita viðskiptavini og öskraði á starfsfólk. Hann var vistaður í fangageymslu

Ofurölvi maður var handtekinn í Hlíðahverfi á áttunda tímanum og var hann vistaður í fangageymslu.

Þrír ökumenn voru kærðir fyrir of hraðan akstur á Kringlumýrarbraut í kringum miðnætti. Leyfður hámarkshraði þar er 80 km/klst. Mældist hraði bifreiða ökumannanna 113 km/klst, 121 km/klst og 108 km/klst.