Mbappe ferðaðist með liðinu til Manchester í dag og er í hóp PSG fyrir seinni undanúrslitaleik Manchester City og PSG sem fer fram á morgun. Mbappe hefur verið að kljást við meiðsli í kálfa og spilaði hann ekki með PSG um helgina.

„Við eigum enn eftir að meta stöðuna með Kylian,“ sagði Pchettino á blaðamannafundi.

„Hann æfir einn í dag og við sjáum hvort hann geti verið með hópnum í lokin. Það er enn einn dagur í þetta. Við höfum ekki tekið ákvörðun.“

PSG þarf að minnsta kosti að skora tvö mörk í leiknum á morgun til að komast í úrslitaleik Meistaradeildarinnar þar sem City skoruðu tvö mörk á útivelli í fyrri leiknum. Ljóst er að sóknarmöguleikar PSG minnka ef Mbappe verður ekki með en Pochettino lofaði að liðið myndi gefa allt í leikinn.

„Auðvitað ætlum við að reyna allt til að gefa aðdáendunum eitthvað magnað. Við viljum þetta meira en nokkuð. Þessi leikur mun reyna á andlegu hliðina og við ætlum að standa okkur.“