Ensku klúbbarnir Liverpool, Manchester United, Manchester City, Tottenham, Arsenal og Chelsea hafa nú tapað ansi miklum pening eftir að hafa sagt sig úr Ofurdeildinni og von er á enn meira tapi segir í frétt Sportsmail.

Þau félög sem höfðu skrifað undir samning við Ofurdeildina höfðu einnig keypt hluta í deildinni fyrir um 8 milljónir punda á haus. Vonin var að Ofurdeildin myndi springa út og verða gífurlega vinsæl um heim allan sem myndi margfalda þessa fjárfestingu klúbbanna.

Öll ensku liðin keyptu hlut í Ofurdeildinni og var sá peningur notaður til að skipuleggja deildina sjálfa, ræða við sjónvarpsstöðvar og auglýsendur ásamt því að borga lögfræðikostnað og fleira. Það er óljóst hversu miklum pening var eytt og hvort að klúbbarnir fái eitthvað til baka.

Í gær kom einnig fram að ensku klúbbarnir gætu verið sektaðir fyrir það að draga sig út úr Ofurdeildinni þar sem þeir skrifuðu í síðustu viku undir samning sem var bindandi í a.m.k. þrjú ár. Sá samningur hafi verið gerður til að forðast það að klúbbarnir hættu við ef umræðan yrði slæm.