Aðeins árangur innan vallar varð til þess að stjórn Tottenham ákvað að reka Jose Mourinho úr starfi. Fréttir um annað eru sagðar rangar.
Á samfélagsmiðlum hefur því verið haldið fram að Mourinho hafi neitað að stýra æfingu Tottenham í morgun, vegna Ofurdeildarinnar sem greint var frá í gær.
Fjöldi virtra blaðamanna hefur slökkt í þessum falsfréttum en Simone Stone hjá BBC er einn af þeim. Aðeins árangur Mourinho með Tottenham kostaði hann starfið. Tottenham er eitt af 12 félögum sem stofnuðu deildina.
12 evrópsk stórlið á knattspyrnusviðinu tilkynntu seint í gærkvöldi að þau hafi tekið saman höndum um stofnun Ofurdeildar, The Super League. UEFA er alfarið á móti þessu og hótaði í gær að útiloka liðin og leikmenn þeirra frá þátttöku í öllum mótum á alþjóðasviðinu. Þá hafa knattspyrnusamböndin í Englandi, Spáni og á Ítalíu hótað að reka liðin úr deildarkeppnunum þar í landi. Markmiðið með deildinni er að til verði keppni þar sem 15 lið eiga alltaf fast sæti en árlega fái 5 önnur lið aðgang að keppninni.
Liðunum verður skipt í tvo 10 liða riðla þar sem liðin leika heima og að heiman gegn hvert öðru. Leikið verður í miðri viku og ætla liðin að vera áfram með í deildarkeppnunum í heimalöndum sínum. Þrjú efstu liðin úr hvorum riðli fara síðan beint áfram í átta liða úrslit þar sem leikið verður heima og að heiman með útsláttarfyrirkomulagi. Liðin í fjórða og fimmta sæti riðlanna leika um lausu sætin tvö í átta liða úrslitunum. Þau tvö lið sem komast í úrslitin leika síðan einn leik til úrslita um sigur í deildinni
Stofnfélög deildarinnar eru:
Arsenal
Chelsea
Liverpool
Manchester City
Manchester United
Tottenham
Atlético Madrid
Barcelona
Real Madrid
AC Milan
Inter Milan
Juventus.
Jose exit down to results alone. Suggestions he refused to take training due to Super League plan have been described to be as ‘nonsense’.
— Simon Stone (@sistoney67) April 19, 2021
