Jurgen Klopp hefur viðurkennt að pressa er á leikmönnum sínum í Liverpool að enda í einu af fjórum efstu sætum ensku úrvalsdeildarinnar. Sú pressa jókst verulega þegar Liverpool datt úr leik í Meistaradeild Evrópu gegn Real Madrid í vikunni

„Við verðum að grípa tækifærið og spila okkar besta fótbolta. Við erum að sjálfsögðu undir pressu þar sem við viljum enda í topp fjórum en vitum ekki eins og er hvort það takist. Við höfum nú sjö leiki til að sanna okkur og við ætlum að reyna,“ sagði Klopp á blaðamannafundi.

„Við skulum ekki gleyma mótherjum okkar. Við höfum unnið síðustu þrjá leiki og þess vegna erum við enn í dæminu og eigum enn möguleika á Meistaradeildarsæti.“

„Það er ljóst að við verðum að vinna fótboltaleiki. Það væri best að vinna þá alla en þetta eru allt erfiðir mótherjar og við berum virðingu fyrir öllum.“

Liverpool mætir Leeds á mánudagskvöld í ensku úrvalsdeildinni en Klopp ber mikla virðingu fyrir Bielsa og leikmönnum Leeds:

„Þeir vörðust vel gegn City. Sigurinn var magnaður en Leeds er virkilega gott lið og þjálfari þeirra er einn sá allra besti sem hjálpar augljóslega.“