Tveir leikir fara fram í 8-liða úrslitum Meistaradeildar Evrópu í kvöld. Chelsea tekur á móti Porto og Paris Saint-Germain fær Evrópumeistara Bayern Munchen í heimsókn. Um er að ræða seinni viðureignir liðanna í einvígunum.

Á Ramón Sanchez Pizjuan vellinum í Sevilla á Spáni, mætast Chelsea og Porto. Fyrri leikur liðanna fór fram á sama velli og þá var Porto heimaliðið. Sá leikur endaði með 2-0 sigri Chelsea.

Thomas Tuchel, knattspyrnustjóri Chelsea greindi frá því í viðtali fyrir leik að Chelsea muni í grunnatriðum ekki breyta sinni nálgun í leiknum frá síðasta leik.

„Porto veit að þeir munu þurfa að skora þrjú mörk, það er alveg ljóst. Við munum ekki breyta okkar nálgun bara af því að við unnum 2-0 sigur seinast,“ sagði Tuchel í viðtali fyrir leik.

Chelsea hefur því þægilega forystu þegar flautað verður til leiks klukkan 19:00 í kvöld en þetta er Meistaradeild Evrópu og það getur allt gerst.

Byrjunarlið Chelsea:
Mendy, Azpilicueta, Thiago Silva, Rudiger, James, Jorginho, Kante, Chilwell, Mount, Havertz, Pulisic

Byrjunarlið Porto:
Marchesin, Pepe, Uribe, Marega, Zaidu, Grujic, Corona, Manafa, Mbemba, Otavio, Sergio Oliveira

Á Parc des Princes í París taka heimamenn í Paris Saint-Germain á móti Bayern Munchen. Fyrri leikur liðanna fór fram á Allianz Arena í Þýskalandi og var æsispennandi. Paris Saint-Germain fór þar með 3-2 útisigur af hólmi og freistar þess að slá Evrópumeistarana úr leik í kvöld.

Hans Flick, knattspyrnustjóri Bayern Munchen, segir að verkefni kvöldsins verði erfitt en að þetta séu leikirnir sem leikmenn vilji spila.

„Við viljum valda minniháttar uppnámi hérna í París. Auðvitað verðum við hæstánægðir ef við náum því,“ sagði Flick í viðtali fyrir leik.

Byrjunarlið Paris Saint-Germain:
Navas, Dagba, Danilo, Kimpembe, Diallo, Gueye, Paredes, Di María, Neymar, Draxler, Mbappe

Byrjunarlið Bayern Munchen:
Neuer, Pavard, Boateng, Alaba, Hernandez, Kimmich, Muller, Coman, Sane, Davies, Choupo-Moting