Brighton tók á móti Everton í lokaleik umferðarinnar í ensku úrvalsdeildinni. Hvorugu liðinu tókst að koma knettinum í markið.
Fyrri hálfleikur var fremur rólegur. Markmenn liðanna, Robert Sanchez og Robin Olsen, höfðu lítið fyrir stafni. Tom Davies fékk besta færi Everton eftir um hálftíma leik þegar hann skallaði framhjá marki Brighton. Besta færið hinum megin á vellinum fékk Neal Maupay þegar skot hans fór af Yerri Mina og rétt framhjá. Staðan í hálfleik var markalaus.
Í síðari hálfleik voru það heimamenn sem voru líklegri til að skora en nýttu ekki færin sín til þess. Everton fékk að vísu dauðafæri í uppbótartíma en Alex Iwobi brást bogalistin.
Gylfi Þór Sigurðsson var á sínum stað í byrjunarliði Everton. Hann lék allan leikinn á miðjunni.
Everton hefði með sigri getað gert sig virkilega gildandi í Meistaradeildarbaráttunni. Þeir eru nú 7 stigum á eftir West Ham, sem er í fjórða og síðasta Meistaradeildarsætinu. Everton á þó leik til góða á liðin fyrir ofan.
Brighton er í 15.sæti, 7 stigum fyrir ofan fallsvæðið.
