West Bromwich Albion vann öruggan sigur á heimavelli gegn Southampton í fyrri leik kvöldsins í ensku úrvalsdeildinni.
West Brom voru mun betra liðið í fyrri hálfleik og réðu leiknum. Mbaye Diagne virtist vera að koma þeim yfir snemma leiks en var dæmdur rangstæður, ranglega að því er virðist. VAR breytti dómnum þó ekki þar sem ekki var hægt að teikna nógu skýra línu út frá endursýningum til að sýna að Diagne væri rangstæður. Kyle Bartley stóð við hlið hans í aðdraganda marksins og gæti hafa truflað sýn myndavéla. Furðulegt atvik.
Heimamenn skorðuðu þó mark sem fékk að standa eftir rúman hálftíma leik. Þar var að verki Matheus Pereira, af vítapunktinum. Fraser Forster, markvörður Southampton, hafði brotið á Pereira og var vítið því gefið.
Áhorfendur þurftu aðeins að bíða í örfáar mínútur eftir næsta marki West Brom. Það kom eftir góða sókn sem endaði með því að áðurnefndur Diagne lagði upp mark fyrir Matthew Phillips. 2-0 í hálfleik.
Það var aðeins bjartara yfir gestunum er þær mættu út í seinni hálfleik. Það breytti því þó ekki að Callum Robinson kláraði leikinn fyrir West Brom þegar 20 mínútur lifðu leiks. Okay Yokuslu stakk boltanum þá innfyrir vörn Southampton á Robinson sem afgreiddi leikinn fyrir heimamenn.
Til að gera slæman dag dýrlinganna enn verri klúðraði James Ward-Prowse víti í uppbótartíma. Sam Johnstone í marki West Brom var ekki á því að fá á sig mark í dag og varði vítið.
Lokatölur 3-0 fyrir West Brom sem eru þó áfram í erfiðri stöðu í næstneðsta sæti deildarinnar, 8 stigum frá öruggu sæti. Southampton er í 14.sæti, 10 stigum fyrir ofan fallsvæðið.
