„Það var ekkert erfitt fyrir mig að horfa á þetta en leiðinlegt fyrir strákana,“ sagði Arnar Þór Viðarsson, landsliðsþjálfari Íslands eftir 3-0 tap gegn Þýskalandi í undankeppni HM í kvöld. Um var að ræða fyrsta leik í nýrri keppni og fyrsta leik liðsins undir stjórn Arnars.
Þýskaland komst í 2-0 eftir sjö mínútna leik og brekkan var brött. „Við vissum að við værum að spila gegn sterku liði með frábærum leikmönnum. Leikplanið fer í vaskinn á annari mínútu. Það sem er verra er að fá annað markið eftir sjö mínútur. 1-0 úti á móti Þjóðverjum og þú ert alltaf inni í leiknum. Það þarf mikla karaktera til að standa í lappirnar, þetta fyrir að þetta hafi byrjað svona illa þá fannst mér strákarnir þegar leið á fyrri hálfleik finna taktinn. Þeir fundu lausnirnar á þeirra hreyfingum og sóknarbolta.“
„Maður hefur tíma í hálfleik til að fara yfir leikinn og ræða málin. VIð sjáum í seinni hálfleik að það býr rosalegur karakter í þessum strákum. Það er stórhættulegt ef þú byrjar svona gegn Þýskalandi að tapa mjög stórt. Ég er ánægður fyrir hönd leikmanna hvernig þeir kláruðu leikinn.“
Rúnar Már Sigurjónsson fór af velli í fyrri hálfleik og ástand hans er óvíst. „Rúnar fékk högg á höfuðið, hann sá ekki út um annað augað. ÉG hef ekki meiri upplýsingar um það, við vonum að þetta sé bara tímabundið í kvöld.“
