Benedikt Bóas Hinriksson, blaðamaður á Fréttablaðinu, var gestur í sjónvarpsþætti 433.is sem sýndur var á Hringbraut í gær.

Benedikt ræddi þar við Hörð Snævar Jónsson, ritstjóra 433.is, um komandi landsleikjatörn hjá íslenska karlalandsliðinu sem hefur leik í undankeppni HM á morgun gegn Þýskalandi ytra.

Íslenska landsliðið varð fyrir áfalli rétt áður en að hópurinn kom saman en besti leikmaður Íslands undanfarin ár, Gylfi Þór Sigurðsson, leikmaður Everton, dró sig úr landsliðshópnum. Ástæðan er sú að hann og eiginkona hans, Alexandra, eiga von á sínu fyrsta barni á næstunni.

Benedikt telur að þjálfarateymi íslenska landsliðsins hlyti að hafa búist við þessari ákvörðun Gylfa.

„Þetta getur ekki hafa komið Arnari alveg á óvart, miðað við fréttir sem maður lesið og skrifað sjálfur þá er Alexandra ólétt og á að eiga um miðjan apríl. Þetta var alveg líkleg staða. Ég skil Gylfa vel, ég hefði ekki viljað missa af fæðingu dætra minna.“

Ljóst er að höggið fyrir íslenska landsliðið með fjarveru Gylfa, sé mikið.

„Gylfi er okkar besti leikmaður, hann er okkar alfa og omega, auðvitað er þetta hræðilegt (að vera ekki með hann í landsliðshópnum). Maður hefur séð og heyrt að nú þurfi aðrir að stíga upp en ég velti því fyrir mér hver á að koma í staðin.“

Framundan eru þrír útileikir hjá íslenska landsliðinu í þessu landsleikjahléi gegn Þýskalandi, Armeníu og Liechtenstein. Benedikt segir að sex stig af mögulegum níu úr þessum þremur leikjum væru ásættanleg.

Benedikt myndi sætta sig við fjögur stig úr þessum þremur leikjum og segir það jafnframt galið að vera fara fram á tvo sigra úr leikjunum þremur.

„Það er náttúrulega algjörlega galið að fara fram á sex stig. Að baki er samt náttúrulega áratugur af velgengni þannig ég get sýnt þessu sjónarmiði skilning.“

„Auðvitað gerir maður kröfu á sex stig, sjö stig væru stórkostleg þá yrði þjóðhátíð. Fjögur stig úr þessum leikjum væri allt í lagi. Ég vona bara að þetta muni spilast þannig að eftir þessa þrjá leiki verði mótið ekki bara búið fyrir íslenska landsliðið,“ sagði Benedikt Bóas, blaðamaður á Fréttablaðinu í sjónvarpsþætti 433.is.

Viðtalið við Benedikt og þáttinn í heild sinni má sjá hér fyrir neðan.