Joachim Löw, landsliðsþjálfari karlalandsliðs Þýskalands, sat fyrir svörum á blaðamannafundi fyrir leik þýska liðsins gegn Íslandi á morgun í undankeppni HM.

Löw er ekki hissa á þeirri velgengni sem íslenska landsliðið hefur upplifað á síðustu árum, sem kom liðinu til að mynda á tvö stórmót.

„Íþróttir gegna mikilvægu hlutverki á Íslandi, meira að segja yfir hörðustu vetrarmánuðina. Íslenska þjóðin er þekkt fyrir sigur hugarfar sitt. Sama hvernig leikurinn spilast, þá geturðu verið viss um að íslenska liðið mun ekki gefast upp,“ sagði Joachim Löw, landsliðsþjálfari Þýskalands.

Löw er meðvitaður um styrkleika íslenska landsliðsins.

„Íslenska landsliðið á aðeins möguleika með því að spila saman sem lið. Þeir eru þéttir og geta varist mjög vel. Liðið spilar hraðan fótbolta og geta sótt hratt á varnir andstæðinganna. Það er mjög erfitt að spila gegn þessu liði,“ sagði Joachim Löw á blaðamannafundi.

Leikur Þýskalands og Íslands fer fram í Duisburg í Þýskalandi á morgun. Leikurinn hefst klukkan 19:45. Þetta er fyrsti leikur liðanna í undankeppni HM.