„Styttist óðum í fyrsta flug Play,“ segir í fyrirsögn Viðskiptablaðsins í dag í frétt um flugfélagið sem aldrei hefur flogið. Í fréttinni kemur fram að félagið stefni á skráningu á First North-hlutabréfamarkaðinn.

Samkvæmt heimildum blaðsins eru forsvarsmenn flugfélagsins að gera hvað þeir geta til að tryggja fjármögnun flugfélagsins til ársloka 2022. Þá herma heimildir Viðskiptablaðsins að Einar Örn Ólafsson, fjárfestir og fyrrverandi forstjóri Skeljungs, sé einn af fjárfestum félagsins. Einnig segir að forsvarsmenn félagsins hafi fundað með stærstu lífeyrissjóðum landsins í vikunni.

„Það liggur fyrir að það styttist í fyrsta flugið hjá Play“

Arnar Már Magnússon, forstjóri flugfélagsins Play, vildi ekki staðfesta þetta í samtali við Viðskiptablaðið en hann sagði þó að stutt væri í fyrsta flug Play. Félagið hefur starfað síðan í lok árs 2019 en nú, rúmlega ári síðan, hefur flugfélagið ekki ennþá sett eina einustu vél í loftið.

„Það liggur fyrir að það styttist í fyrsta flugið hjá Play og við höfum því nýtt tímann undanfarið vel þar sem það er augljóst að við þurfum að ráða fleira fólk og fá meira fjármagn til að framkvæma okkar áætlanir,“ sagði Arnar í samtali við blaðamann Viðskiptablaðsins.

„Allt við Play er svo geggjað

Lögmaðurinn Árni Helgason hæðist að flugfélaginu í kjölfar fréttar Viðskiptablaðsins um félagið. Árni birtir færslu á samfélagsmiðlinum Twitter um málið en Árni er ansi vinsæll á miðlinum. „Allt við Play er svo geggjað,“ segir hann.

„Búið að starfa heillengi, fá hlutabætur fyrir starfsmenn og ætlar núna á markað. Væntanlega stutt í að fyrsti starfsmaður Play fari á eftirlaun, líti um öxl og rifji upp starfsævi sína hjá flugfélaginu sem hefur gert margt en reyndar aldrei flogið.“