Bruno Fernandes miðjumaður Manchester United á ekki skilið að vinna verðlaunin sem besti knattspyrnumaður ársins á Englandi. Þetta er skoðun Paul Scholes um stöðu mála.
Scholes segir að leikmaður úr herbúðum Manchester City eigi skilið að fá verðlaunin enda sé liðið með yfirburði í deildinni.
„Hann hefur komið með ótrúlega hluti inn í þetta lið, hann skapar mörk, skorar mörk en ekki í stórleikjum,“ sagði Scholes um stöðu mála.
„Þegar þú ert hjá United þá er þess krafist að þú vinnir titla og stórleiki. Hann verður að skila því.“
„Ég get gefið honum smá slaka þegar hann er með þessa varnarlínu hjá United. Þeir fara of aftarlega í stærri leikjum og gefa sóknarmönnum lítið færi til að vinna boltann ofarlega á vellinum.“
„Hann á skilið að vera með í samtalinu um leikmann ársins en það eru nokkrir hjá City á undan honum. Leikmaður ársins á að koma frá besta liðinu.“
