Eins og vanalega sinnti lögreglan á höfuðborgarsvæðinu fjölbreyttum verkefnum síðasta sólarhringinn, eins og segir frá í dagbók hennar.

Veitingahús voru heimsótt og kannaðar voru aðstæður með tilliti til sóttvarnareglna. Var ástand almennt gott en einn veitingastaður var ekki búinn að loka kl. 22 og má búast við kæru.

Mikið var um útköll vegna hávaða, þ.e. 15 talsins.

Um hálfsexleytið í gær var tilkynnt um þjófnað úr bíl í Vesturbænum. Var farið inn í bílinn og stolið úlpu og tveimur borvélum.

Upp úr kl. 18 var tilkynnt um þjófnað á sundstað en farið var í fataskáp og tekinn farsími að verðmæti 160 þúsund krónur.

Á fjórða tímanum í nótt var tilkynnt um þjófnað úr verslun í hverfi 108. Maður var stöðvaður er hann var að yfirgefa verslunina með varning, sem var humar, nautakjöt, krem og fleira, fyrir tæpar 55.000 krónur.

Bíll var stöðvaður í miðbænum á fjórða tímanum. Ökumaðurinn reyndist vera réttindalaus enda aðeins 16 ára. Tveir farþegar voru í bílnum. Málið var unnið með aðkomu foreldra og tilkynningu til Barnaverndar.

Laust eftir kl. 3 í nótt óskaði leigubílstjóri eftir aðstoð í hverfi 113. Farþegi var með dólg og neitaði að greiða fargjaldið. Skemmdi hann greiðslukortalesara bílstjórans. Þegar lögregla kom á vettvang var búið að greiða fyrir aksturinn. Farþeginn var kominn inn í hús og vildi lítið ræða við lögreglu.