Joe Biden hefur svarið embættiseið sem forseti Bandaríkjanna og flytur í þessum rituðu orðum innsetningarræðu sína. Þar hefur hann lagt mikla áherslu á að tala gegn rasisma og einangrunarhyggju. Einnig hefur honum orðið tíðrætt um kórónaveirufaraldurinn.
Biden sagði að það þyrfti mikla samstöðu þjóðarinnar til að sigrast á þessum vandamálum en enginn skyldi segja honum að hlutirnir gætu ekki breyst.
Biden þakkaði ennfremur fyrirrennurum sínum í embætti forseta Bandaríkjanna, úr báðum flokkum, frá sínum dýpstu hjartarótum. Hann lagði jafnframt mikla áherslu á að hann yrði forseti allra Bandaríkjamanna, ekki bara demókrata.
Biden benti ennfremur á að í sögu Bandaríkjann hefði samstaða ávallt haft betur en sundrungaröflin. Hann sagði að sundrungaröflin ættu sér djúpar rætur í samfélaginu og hann þekkti þau vel. „Sagan, trúin og skynsemin eru vegvísarnir, leiðin til sameiningar,“ sagði forsetinn nýi.
https://www.youtube.com/watch?v=fWQseRfNm4g&feature=emb_logo