Tilkynnt hefur verið til Lyfjastofnunar um þrjú dauðsföll í kjölfar bólusetningar gegn COVID-19 hér á landi.

Samkvæmt ummælum Rúnu Hauksdóttir Hvannberg, forstjóra Lyfjastofnunar, við mbl.is er ekki um orsakatengsl að ræða. Tveir einstaklingar sem í hlut eiga voru með undirliggjandi sjúkdóma og dvöldust á heilbrigðisstofnunum er þeir voru bólusettir. Nú þegar hafa 5.000 manns í forgangshópi verið bólusettir.

Tólf tilkynningar um aukaverkanir af völdum bóluefnisins hafa borist Lyfjastofnun og þessi tvö dauðsföll eru meðal þeirra tilkynninga.

Samkvæmt frétt RÚV hafa þrjú dauðsföll verið tilkynnt til Lyfjastofnunar í kjölfar bólusetninga en í frétt mbl.is voru þau sögð tvö. Þórólfur Guðnason, sóttvarnalæknir, segir í samtali við RÚV að óvíst sé hvort dauðsföllin þrjú tengist bólusetningunum. Hann segir að afla þurfi meiri upplýsinga um heilsufar þessa fólks áður en komist sé að niðurstöðu um hvort bólusetningarnar tengist andlátunum. Þórólfur segir:

„Maður þarf líka að muna að þarna var verið að bólusetja þá veikustu og elstu í samfélaginu, sem eru hrumir og með langvinna sjúkdóma. Það getur ýmislegt haft áhrif sem ekki tengist bólusetningunni þegar um er að ræða veikast fólkið okkar. Þannig að spurningin er hvort þetta tengist bólusetningunni. Það getur verið erfitt að fullyrða nokkuð um það.“