Kvikmynd Baltasars Kormáks, Everest, var vinsælasta kvikmynd landsins á síðasta ári og þénaði rétt tæpar 90 milljónir króna. Alls fóru 67 þúsund manns að sjá myndina, sem er tæplega tíu þúsund fleiri en sáu Star Wars: The Force Awakens. Hana sáu um 58 þúsund manns og þénaði myndin um 78 milljónir króna. Þess má þó geta að Star Wars var sýnd um miðjan desember og er árangur þeirrar myndar í miðasölunni með ólíkindum.

Þá má þess einnig geta að rétt rúmlega 21 þúsund sáu verðlaunamyndina Hrúta í bíói á síðasta ári. Myndin þénaði um 30 milljónir króna, en hún vann meðal annars til verðlauna á Cannes hátíðinni frægu eins og kunnugt er.

Bíóárið var ansi gott fyrir rekstraraðila kvikmyndahúsa, en tekjur kvikmyndahúsa vegna miðasölu jukust um 4,44% og voru rúmlega einn og hálfur milljarður króna.

Vefsíðan Klapptré tók að auki saman gengi íslenskra kvikmynda í kvikmyndahúsum á síðasta ári. Þar kemur fram að heildartekjur myndanna, sem voru 16 talsins, voru 73 milljónir króna, sem er samanlagt minna en Everest þénaði eins og sér.

Á vefsíðu Klapptré segir einnig að myndum hafi fjölgað nokkuð á síðasta ári, eða úr níu í sextán, en þrátt fyrir fjölgun voru tekjur íslenskra kvikmynda umtalsvert minni árið 2015 eða 73.824.318 kr. sem er um 63 prósenta lækkun frá árinu á undan þegar íslenskar myndir höluðu inn tæpar 197 milljónir króna.

Nánar má lesa greiningu Klapptrés hér.