Hressingarhælið í Kópavogi verður héðan af nýtt í þágu lýðheilsu og geðræktar. Þetta kemur fram í tilkynningu Kópavogsbæjar. Segir þar að stefnt verði að því að þar verði haldin námskeið og erindi á sviði geðræktar til að efla andlega heilsu íbúa en í fyrstu verður áhersla lögð á að vinna með börnum og ungmennum.
Verkefnið er unnið eftir tillögu stýrihóps um lýðheilsu en þar kemur fram að brýnt sé að leggja rækt við andlega heilsu barna og ungmenna en nýleg skýrsla Unicef sýndi að styrkja þurfi félagsfærni íslenskra ungmenna. Þá er andleg vanlíðan ein helsta ástæða skertra lífsgæða í dag samkvæmt Alþjóðaheilbrigðismálastofnuninni, að því er segir í tilkynningunni.
Anna Elísabet Ólafsdóttir, sérfræðingur lýðheilsumála hjá Kópavogsbæ, segir: „Að nýta gamla hressingarhælið sem miðstöð fræðslu og færniþjálfunar á sviði geðræktar er gott og mikilvægt verkefni. Geðrækt og andleg líðan hefur verið mikið til umræðu undanfarin misseri þó hefur hún sjaldnast verið meiri en nú á tímum heimsfaraldurs. Börnin okkar og ungmenni hafa kallað eftir meiri sálfræðilegum stuðningi og þetta nýsköpunar og þróunarverkefni er eitt af því sem við ætlum að gera til að svara því kalli.“
Húsið stendur við Kópavogsgerði og var þar reist sem hæli fyrir útskrifaða berklasjúklinga að frumkvæði kvenfélagsins Hringsins árið 1926. Arkitekt þess var Guðjón Samúelsson, húsameistari ríkisins.
Síðar var húsið notað sem holdsveikraspítali og húsnæði Þroskaþjálfaskólans.
Kópavogsbær hefur látið gera húsið upp að miklu leyti á undanförnum árum. Segir í tilkynningu Kópavogsbæjar að lagfæringar á ytra byrði hússins er að mestu lokið og hefur umhverfi hússins verið lagfært, hellulagt og tyrft.
