Mörg þúsund Eþíópíumenn, sem vonuðust eftir betra lífi, dvelja nú við ólýsanlegar aðstæður í fangabúðum í Sádi-Arabíu. Mörg þúsund manns, þar á meðal barnshafandi konur og börn, hafa verið flutt frá Jemen í fangabúðir í Sádi-Arabíu þar sem þau sæta grófum misþyrmingum. Þetta kemur fram í nýrri skýrslu frá Amnesty International.

Fram kemur að minnst þrír hafi látist og að í búðunum sé fólk hlekkjað saman, tveir og tveir. Fólkið situr í yfirfullum klefum allan sólarhringinn og neyðist til að gera þarfir sínar á gólfið.

„Barnshafandi konur, kornabörn og lítil börn sitja innilokuð við þessar hræðilegu aðstæður,“

segja samtökin og hvetja yfirvöld í Sádi-Arabíu til að láta fólkið laust og síðan þurfi að aðstoða það við að komast aftur heim.

„Mörg þúsund Eþíópíumenn, sem yfirgáfu heimili sín í von um betra líf, þurfa nú að þola þessa ólýsanlegu grimmd,“

segir í skýrslunni.

Eþíópíumenn hafa lengi litið á Sádi-Arabíu sem góðan áfangastað til að flýja ástandið í heimalandi sínu. Talið er að um hálf milljón Eþíópíumanna sé í Sádi-Arabíu. Fyrir þremur árum byrjuðu yfirvöld að taka hart á ólöglegum innflytjendum og flytja nú um 10.000 úr landi í hverjum mánuði nema hvað hlé var gert á þessu þegar heimsfaraldur kórónuveirunnar skall á.