Baldur Borgþórsson, borgarfulltrúi Miðflokksins, mótmælir harðlega því sem hann telur vera forkastanlega framkomu borgarinnar við námsmenn sem búa í íbúakjarna í Grafarholti. Þar sem bílastæðum í hverfinu hafi fækkað um 70% séu námsmennirnir neyddir til að leggja ólöglega. Bílastæðasjóðir setji síðan háa sektarmiða á alla bílana. Meðfylgjandi myndir sýna þetta.
Mynd: Facebook
Í stuttu pistli sem Baldur vakti athygli DV á segir hann að þetta sé óforsvaranleg framkoma við námsmenn sem eigi betra skilið og hljóti að eiga að njóta sömu mannréttinda og aðrir:
„Svona gerir maður ekki!
Forkastanleg framkoma við íbúa borgarinnar:
Staðan í Grafarholti í dag.
Bílastæðum íbúa í íbúðakjarna námsmanna í hverfinu hefur verið fækkað um allt að 70%.
Hægur vandi hefði verið að útbúa annað úrræði fyrir íbúana handan götunnar.
Það var ekki gert.
Þess í stað eru íbúar þvingaðir í að leggja eins og meðfygjandi mynd sýnir enda engin önnur úrræði í boði.
Svo er Bílastæðasjóður sendur á staðinn og sektarmiðar upp á kr.10,000,- settur á alla bíla.
Slíkum ,,glaðning“ mega námsmenn ekki við.
Lausnir væru betur þegnar en eru ekki í boði.
Hér kveður við kunnulegan tón:
Engar lausnir, bara vandamál.
Það er eitt að ætla sér að þétta byggð en svona gerir maður ekki.
Námsmenn hljóta að njóta sömu mannréttinda og aðrir.
Að svipta þá úrræðum og sekta svo er hneisa.
Það eru tilmæli undirritaðs að Reykjavíkurborg afturkalli útgefnar sektir og útbúi úrræði fyrir íbúana án tafar.
