Sigríður Á. Andersen, þingmaður Sjálfstæðisflokksins og fyrrverandi dómsmálaráðherra, mælir gegn því að gripið verði til hertari aðgerða á ný til að hefta kórónuveirufaraldurinn. Hún bendir á, í pistli sem hún birti í gær, að markmiðið hefði verið að „fletja út kúrfuna“ en ekki koma í veg fyrir að smit komi upp á ný. Hún varar við hræðsluáróðri og segir að einangrunarhyggja beri feigðina í sér. Hver og einn ætti að leggja mat á sinn lífsstíl í faraldrinum:

„Covid 19: Ég vona að það sé ekki ástæða til að óttast að menn hafi misst sjónar á markmiði sóttvarnaaðgerðanna vegna C19. Eins og var margítrekað frá fyrsta degi var markmiðið að ,,fletja kúrfuna“ til þess að gefa heilbrigðiskerfinu færi á að ráða við smit. Það tókst ljómandi vel. Nú finnst mér farið að örla á einhvers konar nýju markmiði sem virðist vera það að engin smit greinist hér á landi.

Samkvæmt helstu sérfræðingum í þessum efnum er það þó allsendis óraunhæft markmið. Skilaboð þeirra hafa þvert á móti verið þau að við munum þurfa að lifa með þessari veiru næstu árin. Verkefnið hlýtur því að vera að undirbúa okkur fyrir það. Ekki með hræðsluáróðri eða síendurteknum opinberum hugleiðingum um ,,skref til baka“ í átt að einangrun og hafta sem við vitum nú þegar að hefur feigðina í för með sér þótt ekki endilega af völdum C19.