„Allir læsir menn ættu að greina ofstækið sem býr að baki þessari árás á prófessorinn,“ segir Jón Steinar Gunnlaugsson, hæstaréttarlögmaður. Í pistli í Morgunblaðinu í dag kemur hann Hannesi Hólmsteini Gissurarsyni prófessor í stjórnmálafræði við Háskóla Íslands til varnar.

„Hann er aðeins að fjalla um þjóðfélagsmál sem eðlilegt er að fjallað sé um í þessari kennslugrein. Hann er, eins og góðum fræðimanni sæmir, að velta uppi sjónarmiðum sem augljóslega skipta máli þegar um þau er fjallað,“ segir Jón Steinar og bætir því við að hann telji það grafalvarlegt mál fyrir Háskóla Íslands að nemendur og kennari skuli hafa „þennan málatilbúnað.“

„Tilgangurinn er sýnilega að vilja stjórna umræðuefnum í vísindum með því hreinlega að banna umfjöllun um málefni sem tengjast þeirri bylgju rétttrúnaðar og fávisku sem um þessar mundir flæðir yfir samfélag okkar,“ segir Jón Steinar og bætir við:

„Það hefur orðið vaxandi vandamál í vestrænum háskólum að á síðari tímum hafa komið upp háværar kröfur lýðskrumsins um að einungis megi fjalla í skólunum um efni sem fellur að orðagjálfri réttrúnaðirns í samfélaginu.“

DV greindi frá því í gær að nemendur í stjórnmálaheimspeki kvörtuðu undan Hannesi árið 2015 og sögðu hann hlutdrægan í kennslu. „Framkoma kennara í kennslustundum er á mörgum tímum vafasöm þar sem hann talar ógætilega um geðsjúkdóma og kynferðisofbeldi. Hann talar til að mynda um fólk með geðsjúkdóma sem aumingja og letingja og réttlætir kynferðisofbeldi með því að segja að þeir sem geta ekki varið sig eigi það skilið að vera nauðgað,“ segir í kvörtun nemendanna. Hannes kom af fjöllum þegar DV ræddi við hann um málið.