Beckham fjölskyldan er farin aftur á stjá eftir einangrun á heimili sínu í nokkra mánuði vegna heimsfaraldurs. Samkvæmt The Sun eru hjónin á Ítalíu með börnum sínum, Brooklyn, Romeo, Cruz og Harper og tilvonandi tengdadóttur sinni Nicola.
Fjölskyldan dvelur í Puglia á suður Ítalíu í sveitasetri við ströndina. Algengt er að stjörnur dvelji í setrinu sem líkist kastala. Michelinstjörnu veitingastaður er á staðnum, golfvöllur, tveir strandklúbbar og lúxus spa.
Fram kemur í grein The Sun að ferðalagið sé það fyrsta sem fjölskyldan leggur í eftir að hafa verið í einangrun á heimili sínu. Samkvæmt frétt sem birtist á mbl.is þann 24. júní síðastliðinn hafði David Beckham þó lagt land undir fót fyrr í sumar. Þar segir að David hafi verið við veiði í Haffjarðará á Snæfellsnesi ásamt Björgólfi Thor Björgólfssyni og Guy Ritchie. Þeir félagar veiddu einnig í ánni á svipuðum tíma í fyrra. Áin var lengi í eigu Thors ættarinnar.
