Fréttablaðið skýrir frá þessu í dag. Haft er eftir Þorsteini að hann hafi fyrst óskað eftir upplýsingum um þetta 2017 og að fyrirspurn sem nú hafi loksins verið svarað sé sú sjöunda sem hann lagði fram.
„Ég tel fullt tilefni til þess að rannsaka gaumgæfilega hverjir hafa hagnast á sölu þessara eigna.“
Er haft Eftir Þorsteini sem sagði að þar sem listi yfir þessar eignir sé nú aðgengilegur á vef Alþingis óski hann eftir aðstoð allra sem þekkja til við að rannsaka söluna.
„Ég myndi fagna skilaboðum um eignir sem seldar hafa verið á óeðlilegu verði. Það vita best þeir sem áttu þær,“ sagði hann. Einnig sagði hann að Ásmundur Einar hafi fullyrt að eignirnar hafi verið seldar á markaðsvirði en það haldi ekki vatni í öllum tilfellum.
Hjá Fréttablaðinu kemur fram að Leigufélagið Stefnir ehf. keypti 31 íbúð af Íbúðalánasjóði í tvennum viðskiptum. Félagið keypti 23 íbúðir um mitt ár 2016 og átta í febrúar 2017. Fyrir íbúðirnar, sem keyptar voru í febrúar, greiddi fyrirtækið 163 milljónir. Íbúðirnar voru strax fluttar yfir í annað félag í eigu sömu aðila, Tjarnarverk ehf., og síðan fljótlega seldar áfram. Í maí 2018 seldi félagið sjö eignir og sú síðasta var seld í upphafi árs 2020. Aðeins sex kaupsamningar eru aðgengilegir en á þeim sést að söluverð þessara sex eigna var 277 milljónir. Fréttablaðið segir að ætla megi að söluverð hinna íbúðanna hafi ekki verið undir 40 milljónum fyrir hverja og eina og hafi félagið hagnast um 100 milljónir á íbúðum Íbúðalánasjóðs á skömmu tíma.
