Óskarsverðlaunaleikarinn Kevin Spacey verður klipptur út úr nýjustu kvikmynd leikstjórans Ridley Scott, All the money in the world, og annar leikari fenginn til að endurleika atriði hans í myndinni. Ákvörðnin er tekin í kjölfar fjölda ásakana á hendur Spacey um kynferðislega áreitni. Forsýningu myndarinnar, sem átti að fara fram á kvikmyndahátíðinni AFI Fest þann 16. nóvember hefur verið aflýst, en stefnt er á að halda í upprunalegan frumsýningardag myndarinnar eftir rúmlega einn og hálfan mánuð, þann 22. desember. Það er kvikmyndavefurinn Deadline sem greindi fyrst frá fréttunum.

Á undanförnum dögum og vikum hafa komið fram æ fleiri ásakanir frá mönnum sem segja Spacey hafa áreitt sig misalvarlega á undanförnum áratugum, meðal annars við tökur á kvikmyndum, sjónvarpsþáttum og þar sem hann hefur starfað sem listrænn stjórnandi í leikhúsinu Old Vic í London. Í kjölfar ásakanna hefur verið hætt við að veita honum heiðurviðurkenningu Emmy-verðlaunanna eins og til stóð, hætt hefur verið við framleiðslu á sjöttu þáttaröð House of Cards og kvikmynd um ævi Gore Vidal þar sem Spacey átti að fara með aðalhlutverkið.

Ólíkt þessum verkefnum var tökum á All the money in the world hins vegar lokið og myndin raunar tilbúin þegar leikstjórinn Ridley Scott og framleiðslufyrirtækið Imperative Entertainment tóku ákvörðunina að klippa Spacey aljgörlega úr myndinni. Myndin er byggð á sönnum atburðum sem áttu sér stað árið 1973 þegar mannræningjar námu á brott John Paul Getty III, sonarson olíujöfursins John Paul Getty. Spacey lék hinn einræna og aldraða auðmann – og þurfti gangast undir fimm klukkustundar förðunaraðgerð á degi hverjum til að líta út fyrir að vera áratugum eldri – en nú hefur verið ákveðið að hinn 87 ára gamli Cristopher Plummer muni endurleika atriðin.

Kvikmyndarisinn Sony sem stendur á bak við myndina ku hafa krafist þess að myndin yrði frumsýnd á réttum tíma þrátt fyrir breytingarnar. Helsta ástæðan er líklega sú að í janúar hefst ný leikin sjónvarpsþáttaröð um sama efni, en þáttunum verður leikstýrt af breska verðlaunaleikstjóranum Danny Boyle. Í yfirlýsingu frá fyrirtækinu segir enn fremur að það væri ósanngjarnt gagnvart öðrum þátttakendum í myndinni að fresta henni: „Það væri mikið óréttlæti að refsa þeim öllum fyrir misgjörðir eins aukaleikara í myndinni.“