Ráðamenn þjóðarinnar fengu launahækkun upp á 6.3 prósent í byrjun árs. Gildir þetta um ráðherra, þingmenn og ráðuneytisstjóra, en forseti Íslands, Guðni Th. Jóhannesson, afþakkaði hækkunina. Þetta kemur fram í svari fjármálaráðuneytisins við fyrirspurn Vísis, sem greindi fyrst frá.
Forsætisráðherra fékk því um 130 þúsund króna launahækkun á mánuði, ráðherrar og ráðuneytisstjórar fá um 115 þúsund króna hækkun og þingmenn fá um 70 þúsund króna hækkun við breytinguna.
Bjarni Benediktsson, fjármálaráðherra, spáði í gær versta samdrætti hér á landi í heila öld, og hefur ríkisstjórnin kallað eftir samstöðu þjóðarinnar á þeim erfiðu tímum sem nú ganga yfir vegna kórónuveirunnar, með tilheyrandi dauðsföllum, atvinnuleysi og algeru hruni ferðaþjónustunnar, hvers áhrif á þjóðarbúið eru enn óvituð.
UPPFÆRT
Bjarni Benediktsson fjármálaráðherra hefur gert athugasemd við frétt Vísis. Hefur Eyjan breytt frétt sinni í kjölfarið:
Þessi ,,frétt“ á vísi.is er röng.
Og visir hefur allar nauðsynlegar upplýsingarnar til að fara rétt með.
Launahækkun sem átti að eiga sér stað 1.júlí í fyrra var með lögum færð til 1. janúar 2020. Þannig standa lögin þrátt fyrir að fyrir mistök í Fjársýslu ríkisins hafi sú hækkun ekki verið greidd út. Launin hækkuðu 1. jan 2020 í fyrsta skipti frá október 2016. Það er því rangt að hækkun taki gildi í sumar með afturvirkum hætti.
Við tókum svo ákvörðun á Alþingi með lagabreytingu um daginn að láta hækkunina, sem átti næst að verða 1. júlí, frestast til áramóta.
Alþingi er ekki að ákveða neinar nýjar launahækkanir. Alþingi hefur hins vegar frestað tveimur síðustu launahækkunum. Það tel ég vera ábyrgt. Launin eru lögákveðin miðað við launaþróun næsta árs á undan. Það er fyrirkomulagið sem tók við eftir að við lögðum niður Kjararáð sem tók við eftir að við lögðum niður Kjaradóm.