Samkvæmt heimildum DV ríkir mikil ánægja með nýjan skólameistara Fjölbrautarskóla Vesturlands á Akranesi (FVA), Steinunni Ingu Óttarsdóttur, sem skipuð var í embættið frá og með síðustu áramótum. Miklar deilar höfðu geisað um fráfarandi skólameistara, Ágústu Elínu Ingþórsdóttur, og skrifaði mikill meirihluti kennara undir vantraustsyfirlýsingu á hana sem afhent var menntamálaráðherra.
Nýjasta ánægjuefnið varðandi Steinunni er undirritun stofnanasamnings milli FVA og ríkisins en kennarar höfðu barist fyrir þessum samningi árum saman. Í frétt á vefsíðu FVA segir um þetta:
„Stofnanasamningur var loksins undirritaður í FVA þann 11. mars sl. eftir áralangt þóf. Í stofnanasamningnum eru lagðar faglegar áherslur næstu ára og félagsmönnum KÍ raðað til launa en síðan er greitt skv. launatöflu sem fylgir miðlægum kjarasamningi. Samstarfsnefnd er sátt við samninginn og hafa kennara FVA samþykkt hann í atkvæðagreiðslu.“
Samningurinn felur í sér grunnhækkun á alla kennara, eingreiðslu og að einni starfsaldurshækkun er bætt við þær sem fyrir voru.
„Ég held að það megi fullyrða að starfsfólk skólans sé hæstánægt með nýjan skólameistara. Þessi samningur var einn ásteytingarsteinninn milli kennarahópsins og fyrri skólameistara. Fyrri skólameistari gat ekki klárað þetta á fimm árum,“ segir heimildarmaður DV í fréttaflutningi af málefnum FVA.
Meðal annarra deilumála milli fyrrverandi skólameistara og starfsfólks skólans var að hún sagði upp aðstoðarskólameistara án þess að fylgja réttum verkferlum, uppsögnin var dæmd ólögleg og ríkið þurfti að greiða fimm milljónir í skaðabætur og málskostnað. Einnig var hún gagnrýnd fyrir að segja upp sjö ræstingakonum fljótlega eftir að hún tók við embætti.
Menntamálaráðherra ákvað síðasta sumar að auglýsa embættið laust til umsóknar. Ágústa Elín Ingþórsdóttir kærði þá ákvörðun þar sem hún taldi sér ekki hafa verið tilkynnt um hana innan tilskilins tíma og hún væri því sjálfkrafa endurráðinn skólameistari frá síðustu áramótum til fimm ára. Ágústa tapaði því máli.
Átök á Akranesi – Erfiðleikar og óánægja í Fjölbrautaskóla Vesturlands
Kennarar við FVA hafa afhent ráðherra vantraustsyfirlýsingu á skólameistara
