Ágústa Elín Ingþórsdóttir, skólameistari Fjölbrautaskóla Vesturlands á Akranesi, tapaði í dag máli sem hún höfðaði gegn íslenska ríkinu. Með stefnu sinni á ríkið vildi hún fá viðurkennt að ráðningartími hennar hefði framlengst sjálfkrafa um fimm ár um síðustu áramót og gilti til 31. desember 2025. Rökin eru þau að Ágústu hafi ekki verið tilkynnt tímanlega sú ákvörðun ráðherra að auglýsa starfið laust til umsóknar.
Lilja Alfreðsdóttir menntamálaráðherra tilkynnti Ágústu símleiðis í sumar að hún hyggðist auglýsa embættið laust til umsóknar. Ágústa spurði þá hvort hún fengi þessa ákvörðun ekki skriflega og kvað Lilja já við því. Ekki tókst hins vegar að afhenda Ágústu bréf þessa efnis þar sem hún var ekki heima.
Héraðsdómur Reykjavíkur hafnaði kröfum Ágústu á ríkið í dag og stendur því ákvörðunin um að ráðningartími hennar sé útrunninn og starfið laust til umsóknar. Málskostnaður var felldur niður. Dóm héraðsdóms má lesa hér.
Ágústa hefur verið umdeild í starfi og í haust greindi DV frá ólgu innan FVA vegna framgöngu hennar. Í frétt DV í haust segir meðal annars:
„Frá því að Ágústa tók við embættinu hefur hún mætt harðri gagnrýni fyrir stjórnunarhætti sína og framkomu við undirmenn. Meðal annars hefur ríkið þurft að greiða ríflega fimm milljónir króna í bætur og málskostnað til fyrrverandi aðstoðarskólameistara sem Ágústa vék úr starfi án þess að fylgja réttum verkferlum.“
Ágústa var einnig gagnrýnd fyrir að segja upp sjö ræstingakonun fljótlega eftir að hún tók við embætti.
Í annarri frétt DV um málið kom fram að 38 af 44 kennurum við skólann hafi afhent Lilju Alfreðsdóttur menntamálaráðherra yfirlýsingu þar sem hún er hvött til að endurráða Ágústu ekki. Yfirlýsingin var svohljóðandi:
„Undirritaður kennarar við Fjölbrautarskóla Vesturlands á Akranesi, FVA, lýsa yfir vantrausti á núverandi skólameistar FVA, Ágústu Elínu Ingþórsdóttur, og beina þeim tilmælum til ráðherra að hún verði ekki endurráðin sem skólameistari skólans.“