Þau pör sem staðfesta samvist sína eiga að halda sig frá því að stunda kynlíf. Skiptir þá engu hvort um er að ræða karl og konu eða fólk af sama kyni. Þetta er skoðun Ensku biskupakirkjunnar sem sendi nýlega frá sér álit um þetta í kjölfar lagabreytingar sem heimilar gagnkynhneigðu fólki einnig að staðfesta samvist sína en fram að þessu var það aðeins samkynhneigt fólk sem mátti skrá sig í staðfesta samvist.

Sky skýrir frá þessu. Segir að í tilkynningu frá biskuparáði kirkjunnar komi fram að það breyti ekki fyrra áliti sínu um að þeir sem eru skráðir í staðfesta samvist eigi að halda sig frá því að stunda kynlíf og byggja sambandið á vináttu.

„Fyrir kristið fólk er hjónabandið ævilangt samband karls og konu, staðfest með hjúskaparheitum, og það er rétti vettvangurinn fyrir kynferðislega virkni.“

Það var á nýársdag sem ný lög tóku gildi sem heimila gagnkynhneigðu fólki að skrá sig í staðfesta samvist en samkynhneigt fólk fékk þessi réttindi með lögum 2004 og 2013 fékk það heimild til að ganga í hjónaband. Nýju lögin voru viðbrögð þingsins við úrskurði hæstaréttar um að það væri mismunun að aðeins samkynhneigt fólk megi skrá sig í staðfesta samvist.

Þegar fólk skráir sig í staðfesta samvist nýtur það sömu réttinda og þeir sem ganga í hjónaband. Enska biskupakirkjan heimilar prestum að vera í staðfestri samvist með fólki af sama kyni en setur það skilyrði að kynlíf sé ekki stundað.